Zer da?
Indarkeria matxista giza eskubideen urraketa bat da, genero-desberdinkerien adierazpenik larriena eta, batez ere emakumeei eragiten diena. Emakumeek emakume izateagatik pairatzen dute. Horretaz gain, sexu-genero-sexualitate sistema nagusiaren aginduak hausten dituzten pertsonek ere jasatzen dute; adibidez, LGTBI+ pertsonek.
Indarkeria matxista gure jendarteko arazo larrienetarikoa da eta mugimendu feministak azken hamarraldian egindako aldarrikapenei esker agenda politiko eta sozialean sartzea lortu da gai hau. 70eko hamarkadaz geroztik mugimendu feministak indarkeria matxistaren kausak, adierazpenak eta ondorioak aztertu eta indarkeria hori pairatzen duten emakumeak indarkeria horretatik askatzeko helburuz esku hartzeko ereduak proposatu ditu.
Indarkeria matxistari aurre egiteko Berdintaun arlotik hainbat lan ildo jorratzen ditugu:
- Erakundeen arteko jarduera eta koordinazio protokoloa
- Arreta eta laguntza emateko baliabide eta zerbitzuen gida
- Kulturarteko Plaza Feminista
- Aholkularitza juridikoa
- Elkarzaintza taldea
- Jaietarako eta sagardotegi garairako kanpainak eta protokoloak
Erakundeen arteko jarduera eta koordinazio protokoloa
Hernaniko Udalak urteak daramatza indarkeria matxista bizi duten emakumeak artatzen eta hauei behar duten erantzuna emateko baliabideak eta koordinazio-bideak fintzen. Zentzu horretan, lanerako tresna garrantzitsuetako bat da Erakunde arteko koordinazio protokoloa. 2012an diseinatu zuen Udalak lehenengo protokoloa, eta 2016an bigarrena, erakunde guztien artean landu eta sinatu zena: Osakidetza, Ertzaintza eta Hernaniko Udala. Geroztik modu koordinatuan egiten dute lan aipatutako erakundeek lan marko honen baitan. 2026 urtean III.protokoloa osatzeko lanketa egingo da.
ERAKUNDE ARTEKO JARDUKETA ETA KOORDINAZIO PROTOKOLOA
Arreta eta laguntza emateko baliabide eta zerbitzuen gida
Protokoloa edukitzea bezain garrantzitsua da herritar orok, eta bereziki indarkeriari aurre egiten ari diren emakumeek beraiek, egoera hauen aurrean nora jo dezaketen jakin, eta zein baliabide eta zerbitzu dituzten ezagutzea. Horretarako, Protokoloaren Mahai Teknikoak informazio hori hedatzeko euskarri bat sortu eta argitaratu zuen 2018an. Orain, gida hori eguneratu eta berritu dugu.
GIDAK
Arreta eta laguntza emateko baliabide eta zerbitzuen gida
Feminismoaren alde eta arrazakeriaren aurka ekiteko sortutako udal ekipamendua da. Bertako koordinatzaileek indarkeria egoerei aurre egiteko beharrezko harrera, arreta eta informazioa ematen dute, emakumea entzun eta izan ditzakeen zalantzak eta kezkak argituz, bestelako espazio edota baliabideetara bideratzeko urratsak ematen ere laguntza eskaintzen dute.
Astelehenetik ostiralera 9:30-21:00.
Larunbatetan 9:30-14:00.
Ez da aurretik hitzordurik eskatu behar.
Aholkularitza juridikoaren zerbitzua
Emakumeenganako diskriminazio eta indarkeria egoeren gaineko informazio juridikoa eskaintzen da ikuspegi feministatik. Langai dira, besteak beste, indarkeria matxista (genero indarkeria, sexu-erasoak, sexu jazarpena…), banaketa, dibortzioa, mantenu pentsioa ez ordaintzea eta bisita erregimenak ez betetzea etab.
Elkarzaintza, Emakumeen elkar zaintzarako taldea
Indarkeria matxista jasan duten edota egoera konplexuak bizitzen ari diren emakumeentzako taldea da, psikologo batek gidatua. Bertan bizipenak partekatu eta elkarrekin osatze prozesua burutzeko aukera eskaintzen da.
Jaietarako eta sagardotegi garairako kanpainak eta protokoloak
Emakumeek jai eta festa eremuan pairatzen dituzten diskriminazio egoerez eta erasoez jakitun, Udalak sentsibilizazio eta prebentzio dinamika desberdinak jartzen ditu abian San Joan jaien testuinguruan nahiz sagardotegi garaian. Sentsibilizazio kanpainekin batera, hainbat baliabide jarri ohi dira.
PROTOKOLOA