Hernaniko Udalak enplegua eta prestakuntza tokiko garapenaren ardatz estrategikotzat hartzen ditu, herritarren laneratzea, lan-ibilbide duinak eta bizi proiektu egonkorrak sustatzeko helburuarekin. Horretarako, enplegu-politikak tokiko errealitatera egokitutako programen bidez garatzen dira, eta prestakuntza eskaintza praktikoa eta komunitateari lotua bultzatzen da.

Enplegua

Hernaniko Udalak honako programa eta zerbitzuak eskaintzen ditu enpleguaren arloan:

• Tokiko Enplegu Ekintzak: Udal zerbitzu eta proiektuetan kontratazio zuzenaren bidez lan esperientzia eskaintzen duten programak, laneratzea errazteko. Beterri Buruntza Mankomunitatearekin elkarlanean.
• Gazte Enplegu Programa: Gazteen laneratzea sustatzeko kontratazio eta laguntza programak, lehen lan esperientzia eskuratzeko aukera emanez.
• Lehen Aukera Programa: Goi-mailako ikasketak dituzten gazteei zuzendutako programa, lan merkatuan lehen esperientzia kualifikatua izateko.
• Gazteen Lan Orientazioa: Gazteei zuzendutako orientazio eta aholkularitza zerbitzua, lan-ibilbideak definitzeko eta lan aukerak identifikatzeko.

Prestakuntza

Prestakuntzaren arloan, Udalak laneratzea eta tokiko beharrak uztartzen dituen eskaintza garatzen du:

• Nekazaritza Eskola: 1. sektorean laneratzeko eta elikadura burujabetzarekin lotutako ezagutzak eskuratzeko prestakuntza ibilbide praktikoa.
• Laneratzerako Prestakuntza- Elkar Ekin: Beterri Buruntza Mankomunitatearekin elkarlanean garatutako prestakuntza programak, laneratzea eta gizarteratzea helburu dituztenak.

Ekintzailetza

Ekintzailetza Koopfabrika ereduak inspiratuta dago, pertsonak eta proiektuak erdigunean jartzen dituena. Zerbitzuaren helburua da tokiko ekimen ekonomikoen sorrera eta sendotzea bultzatzea, bereziki ekonomia sozial eta eraldatzailean, lanaren burujabetzan eta garapen jasangarrian oinarritutakoak.

Ekintzailetza prozesu pertsonal eta kolektibo gisa ulertzen dugu, ideiaren hasieratik jardueraren sendotzeraino laguntza behar duena. Horregatik, zerbitzuak aholkularitza tekniko puntualetik harago doa eta laguntza integral bat eskaintzen du, ikuspegi komunitario eta sare-lanean oinarrituta.

Zer eskaintzen du zerbitzuak?

• Ideia fasean ekintzailetza: proiektuaren definizioa, motibazioen lanketa eta bideragarritasunaren lehen azterketak.
• Aholkularitza pertsonalizatua: arlo ekonomikoan, juridikoan, administratiboan eta antolaketan.
• Prestakuntza kolektiboa: kudeaketa demokratikoa, lan-baldintza duinak, jasangarritasuna eta ekonomia sozial eta eraldatzailearen balioetan oinarritua.
• Sare-lana eta lankidetza: tokiko eragileekin, kooperatibekin eta ekonomia sozialeko sareekin lotura.
• Espazioa eta komunitatea: Iturola elkarlan espazioaren bidez, proiektuak modu partekatuan garatu eta esperimentatzeko aukera.

Zerbitzua Hernani Burujabe estrategiaren barruan bideratzen da, eta ekintzailetza politikekiko ikuspegi klasikoak gainditzeko apustua egiten du, proiektu bideragarri, jasangarri eta gizarte-inpaktuarekin.

Enpresa

Hernaniko enpresa-estrategia Hernaniko Udalaren eta Beterri-Buruntza Mankomunitatearen elkarlanaren bidez garatutako ildo estrategikoa da, tokiko ehun ekonomikoa indartu eta eraldatzea helburu duena. Estrategiak enpresen lehiakortasuna hobetzea, enplegu duina sustatzea eta tokiko ekonomia jasangarriago eta erresilienteago baterantz aurrera egitea bilatzen du.

Esparru honetan, besteak beste, berrikuntza, digitalizazioa, trantsizio energetikoa eta ekonomia sozial eraldatzailea lantzen dira, enpresei laguntza integrala eskainiz eta eskualde mailako lankidetza sustatuz. Beterri-Buruntza Mankomunitatearekin koordinatuta, lurralde ikuspegia txertatzen da, baliabideak optimizatu eta eragin handiagoko ekimenak garatzeko.