Iturola Elkarlan Gunea lan espazio publikoa eta kolaboratiboa da, non proiektu ekonomiko berria garatu nahi duten pertsonek ekintzailetza sarea aurkituko duten. Hernaniko Burujabetzen Etxearen lehen solairuan kokatua, Iturolak enpresei lanerako lekua eta baliabideak eskaintzen dizkie, burujabetzan klabetan, ekonomia sozial eta eraldatzailean eta tokiko garapen jasangarrian oinarritutako ekimen ekonomikoak sustatzeko. Iturola Elkarlan Gunearen helburua ekintzailetza prozesuak, enpresa txikiak eta antolatutako kolektiboak modu integralean laguntzea da, bai hasierako faseetan, bai jardueraren sendotze prozesuetan. Horretarako, erabiltzaileen eskura jartzen ditu ez bakarrik lanerako espazio fisiko bat, baita aholkularitza, orientazioa, sare-lana eta lankidetza-dinamikak ere, tokiko ekosistema ekonomiko eta soziala indartzen laguntzeko.

Iturola Elkarlan Gunean garatzen diren proiektuek balio soziala sortu beharko dute, lan-baldintza duinak sustatu, kudeaketa demokratikoko ereduak bultzatu eta jasangarritasunari ekarpena egin, Hernani Burujabe udal estrategiarekin bat etorriz.

Eskaerak izapidetzeko prozedura

Iturola lankidetza gunea erabili edo bertako zerbitzuak eskuratu nahi dituzten pertsona edo erakundeek eskaera formala aurkeztu beharko dute.

Eskaerak honako helbide elektronikora bidali beharko dira: tokiko-garapena@hernani.eus

Eskaerarekin batera, gutxienez honako informazio hau jasoko duen memoria deskribatzailea aurkeztu beharko da:

• Ekimen ekonomikoaren edo proiektuaren deskribapena.
• Helburuak eta jarduera-ildo nagusiak.
• Ekonomia sozial eta eraldatzailearekin eta lan-burujabetzarekin duen lotura.
• Iturolako espazioari edo zerbitzuei lotutako beharrak (espazio mota, aurreikusitako iraupena, aholkularitza, orientazioa eta abar).
• Proiektuaren egungo egoera eta garapen aurreikuspena.

Jasotako eskaerak Tokiko Garapen Sailak aztertuko ditu, Burujabetzen Etxearen irizpide orokorrak eta Iturola Elkarlan Gunearen funtzionamenduaren arauak kontuan hartuta. Beharrezkotzat jotzen bada, informazio osagarria eskatu edo pertsona edo erakunde eskatzaileekin elkarrizketa bat hitzartu ahal izango da.