Emakumeek nahiz LGTBI pertsonek, arlo sozial, ekonomiko eta politikoan gure herriari egindako ekarpena azaleratu eta aitortzeko asmoz, hainbat ekimen jarri dira martxan azken urteetan. Izan ere, historia ofizialean andreak eta LGTBI pertsonak ikusezin bihurtu gaituzte; eta beraz ezinbestekoa da historiak isildu dituztenen testigantzak argitara ateratzea, eta ondorengoei transmititzea.
Berdintasun Kontseiluak eta Berdintasun Arloak urrats batzuk eman nahi izan ditu egoera irauli nahian, horretarako hainbat ikerketa argitaratu ditu, kale izendegiaren lanketa egin du eta hortik, Hernaniko ibilbide morea ere osatu da.
IKERKETA BEKAK
Berdintasun Kontseiluaren ekimenez jarri ziren martxan ikerketa beka hauek, Hernaniko emakumeen inguruko historia jaso, landu eta herritarren esku jartzeko asmotan.
Dagoeneko, sei ikerketa lan egin dira:
1. LIBURUA: AHOTSAK. EMAKUMEAK HISTORIAN. HERNANI
2. LANA: LA HISTORIA IGNORADA. UNA VISIÓN SOBRE EL PAPEL DE LAS MUJERES EN LA VIDA PÚBLICA DE HERNANI S.XVI-S.XIX
3. LIBURUA: ILUNPETIK ARGITARA. EMAKUME LANGILEAK IRUDITAN. HERNANI (1939-1975)
4. LIBURUA: BIZIRAUPENERAKO ZAINTZA. HERNANIKO INUDEAK 1900-1944
5. LANA: EMPAR PINEDA ERDOZIA. GORPUTZAK HALA ESKATUA
6. LIBURUA: NOIZ BUKATZEN DA ARMAIRUA?
KALE IZENDEGIA
Berdintasun Kontseiluan herriko kale izendegia aztertu zenean (2014.urtean, txostenean dago informazio gehiago) hauxe izan zen ondorioa: 80 kale eta plazetatik, gizon izena zuten 24 kale eta plaza zeuden (pertsona zehatzak, izen abizen propioekin). Aldiz, 5 kale eta plazek zuten izen femenino bat, elizarekin lotuak denak (ez ziren emakume konkretuak).
Hori dela eta, Berdintasun Kontseilutik ezinbestekotzat jo izan da, kale izendegian aldaketak eragitea; aldaketa hauekin emakumeek Hernaniko herrian izan duten presentzia aitortu eta hauei merezitako aitortza egiteko aukera ematen baitu.
Lehenik, Andre kalea berreskuratu zen, ondoren etorri ziren Carmen Adarraga parkea, Azaroak 25 plaza edota Aimar Elosegi Ansa “Moio” kalea. Eta lanketa honetatik sortu zen Ibilbide morea osatzeko ideia.
TXOSTENA
IBILBIDE MOREA
Hernanin barrena egindako ibilbide more honekin beste urrats bat eman nahi izan da oroimen historikoaren berreskurapenean. Hala, gure herriko historiarekin zerikusia izan duten emakumeei eta pertsona trans bati egin nahi izan diegu omenaldia. Pausoz pauso, Hernaniko erreferenteok historiari egindako ekarpena aitortu eta ezagutzera eman nahi du ibilbide honek.
LIBURUXKA
