Udalak etxebizitza eskuratzeko eta bertan bizitzen jarraitzeko zailtasunak dituzten herritarrei zuzendutako laguntza ekonomikoak eskaintzen ditu. Atal honetan kontsulta daitezke alokairurako dirulaguntzak, gazteen emantzipazioa sustatzeko laguntzak eta etxebizitzaren arloan indarrean dauden bestelako udal laguntza-programak, baita horien baldintzak, epeak eta izapidetzeko informazioa ere.
ETXEBIZITZAK ALOKAIRUAN HARTZEKO DIRULAGUNTZAK
Zein da dirulaguntza honen xedea?
Laguntza hauen xedea da eskaera egiten dutenen ohiko bizilekua den etxebizitzaren alokairuaren zati bat ordaintzen laguntzea, dagoeneko etxebizitza errentan hartuta badaukate eta horretara bideratuak dauden gainerako laguntzetarako (Gaztelagun, Etxebizitzarako Prestazio Osagarria, Gizarte Larrialdietarako Laguntza…) eskubiderik ez badute.
Nori zuzenduta dago?
Pertsona fisikoek eskuratu ahalko dute dirulaguntza, bakarrik nahiz bizikidetza-unitate batean bilduta bizi, baldin eta dagokion deialdiko oinarrietan jasotako baldintzak betetzen badituzte.
Alokairuko titular-kide diren pertsona fisikoek ere eskatu ahalko dute dirulaguntza (alokairua partekatu arren bizikidetza unitate bat osatzen ez dutenak).
Zeintzuk dira diruz lagun daitezkeen gastuak?
Deialdia zabaltzen den urte horretako urtarrilaren 1etik abenduaren 31ra bitarteko alokairu-gastuak.
Dirulaguntzaren zenbatekoa errentaren arabera finkatuko da, diru-sarreren arabera.
Dirulaguntzaren gehieneko zenbatekoak ezingo du gainditu hileko errentaren %50a,
ezta Eusko Jaurlaritzak Etxebizitzarako Prestazio Ekonomikorako (EPE) ezarritako gehieneko muga ere.
Dirulaguntza aldi bakar batean ordainduko da.
Zenbat diru bideratzen du Udalak dirulaguntza honetarako?
Azken urteotan, deialdi bakoitzean, Udalak 210.000 euro bideratzen ditu laguntza hori finantzatzeko:
- 105.000 euro: 18-35 urte bitarteko gazteek egindako eskarientzako (“A-Modalitatea”)
- 105.000 euro: 36 urtetik gorako herritarrek egindako eskarientzako (“B-Modalitatea”)
Informazio osagarria:
Deialdi bakoitzaren oinarriak eta beharrezko dokumentazioa Udalaren webgunean eskuragarri, iragarki taula atalean (dirulaguntzak).