Turismoa zeharkako jarduera da eta, beraz, berau planifikatzeko eragile ezberdinen parte hartzea ahalbidetu du Udalak. Agente pribatuak, agente publikoak eta herritarrak turismo jardueraren erdigunean kokatuz, sektorearen planifikazio parte-hartzailea burutu du hausnarketa eta diagnosi partekatu bat osatuz.

Turismo arloan jorratu beharreko lan-ildoak jasotzen dira ondorengo dokumentuan, turismo hausnarketaren baitan burututako diagnostikoan eta turismo iraunkorraren printzipioetan oinarritzen dena.

Hernaniko Udalak aukerak sortzeko tresna moduan ulertzen du jarduera turistikoa. Jarduera aktiboa zein inklusiboa; ekintzak, ondarea, azpiegiturak, baliabideak, jendartea edota egitura ekonomikoa kontuan dituena.

Egungo gizarte ereduak, zenbait eredu tradizionalen agortzea agerian utzi du eta testuinguru horretan kokatzen da turismoa ere. Masifikazio egoerak, zerbitzu eskasiak edota kalitate eta prezioaren gero eta oreka falta handiagoak horren adibide garbiak dira.

Lan honen oinarrian Hernani Burujabe herri-proiektuko printzipioak daude, bai eta turismoari lotutako azken joera teorikoak ere: turismo soziala, neolokalismoa edota hazkuntzaren kontrako tendentziak.