Sailaren egiteko nagusia da turismo sektorearen sustapen estrategikoa:
- Jarduera ekonomikoaren, elkarbizitzaren eta herri bizitzaren arteko orekan eraginez.
- Harrera eginez herritar, turismo agente zein bisitarei.
- Aisialdirako eskaintza eta ondare material zein inmateriala herritarrei zabalduz, baita herritik kanpo promozionatuz ere.
Hernani Gipuzkoako ipar-ekialdean dagoen udalerria da eta 20.000 biztanle baino gehiago ditu. Hiriguneak Santa Barbara mendiaren magalean du kokapena eta Kultura Ondasun gisa Monumentu Multzo izendapena du.
Urumea ibaia da herriko ardatz hidrografikoa eta inguruko mendietan kultura-intereseko ondasun gisa sailkatuta dauden historiaurreko arrasto megalitiko ugari dago.
Hainbat hernaniarrek lehen sektorean jarduten badute ere, industriaren eta zerbitzuen sektoreak dira Hernaniko jarduera ekonomiko nagusiak.
Horiez gain, Hernanik zerbitzu-sektore osoa eta askotarikoa du eta harro eusten dio sagardoa ekoizteko ohiturari; horri esker, sagardotegiak dira, gaur egun, herriko erakargarri nagusietako bat.
Euskara da Hernaniko berezko hizkuntza eta udalerriko bi hizkuntza ofizialetako bat, gaztelaniarekin batera. Bi hizkuntza horiez gain, beste hainbat hizkuntza hitz egiten dira herrian, jatorri anitzeko herritarrak bizi direlako bertan.
Herritarren % 60k badaki euskaraz hitz egiten, eta beste % 20k ulertzen du, nahiz eta euskaraz egiteko gai ez izan. Hernani Udalerri Euskaldunen Mankomunitatean dago integratuta, hori osatzen duten herrietan biztanle gehienek euskaraz komunikatzeko gai dira. Hala ere, hizkuntza gutxiagotua da euskara gure herrian, eta agerikoa da gaztelaniaren nagusitasuna.
Udala eta herritarrak lanean ari gara euskararen erabilera indartzeko, hizkuntza aniztasuna balioan jarriz, euskaraz bizi nahi dugulako gure herrian.
Horregatik, garrantzitsua da hernaniarrontzat herrira zatoztenok euskaraz egitea, euskaraz eskatzea, euskarari eustea. Asko daukagu irabazteko.
