Hernaniko Udalak hainbat elkartasun jarduera eraman izan ditu aurrera urte hauetan, baina hauek narbamentzen dira:

Saharar herriarekiko elkartasuna nabarmendu izan da urte hauetan guztietan, bereziki bi egitasmo hauetan parte hartuz gauzatu dena:

Oporrak bakean

Oporrak Bakean Programa 2003 urteaz geroztik gauzatzen da Hernanin. Udan, Saharako errefuxiatu kanpamenduetatik 10 eta 12 urte bitarteko haurrak Hernanin bi hilabete igarotzera etortzen dira. Hernaniko familietan egon ohi dira.

1. Programaren helburuak

• Mediku azterketak egitea eta behar den kasuetan tratamendua jartzea
• Elikadura gabeziak eragindako arazoei aurre egitea
• Udako basamortuko tenperatura altuak saihestea
• Beste ingurune bat ezagutzea: natur ingurune desberdina eta errealitate soziokultural desberdinekoa.

2. Hernaniko Udalak eskaintzen du

• Haurraren egonaldiko kudeaketa lanak (osasun txartela, PADI txartela, bidaia, etab.)
• Astean zehar goizez haur sahararrentzako udalekuak

Euskal Karabana. Sahararako janari bilketa

Hernaniko Udalak, Saharar Herriarekiko Elkartasunerako Euskal Elkarteekin eta hainbat udalekin batera, Sahararen aldeko Euskal Karabana antolatzen du urtero abenduan. Saharako errefuxiatu kanpamenduetara janaria eta konpresak bidali ohi dira.

Ikastetxeetan, herriko hainbat dendetan eta udal eraikin batzuetan janaria eta konpresak utzi daitezke horretarako dauden kaxetan eta udala arduratzen da horiek dagokion lekura bideratzeaz.

Herri Babesarea giza eskubideen defendatzaileen babeserako EAE mailako udal sarea da, eta Hernaniko Udala bertako kide da sortu zenetik. Sareak udal-administrazioen, euskal gizarte-erakundeen eta hegoalde globaleko giza eskubideen defendatzaileen erakundeen arteko ahaleginak koordinatzea dauka helburu, tokian tokitik giza eskubideen defendatzaileen babesa sustatzeko asmoz.

Horretarako, sarearen esparruan, sentsibilizaziorako, komunikaziorako, egituraketarako eta eragin politikorako ekintzak garatzen dira, defendatzaileen laguntzarako eta babeserako sareak sortzen eta euskal biztanleak giza eskubideen defentsaren garrantziaren inguruan kontzientziatzen laguntzeko.

Herri Babesarea gaur egun Mundubat Fundazioak bultzatutako ekimena da, eta Ciutats Defensores dels Drets Humans de Catalunya ekimena du inspirazio-iturri.